شارپرێس:
حەیدەر عەبادی، سەرۆكوەزیرانی پێشووی عێراق دەڵێت: گەشبینم لەسەردەمی نێچیرڤان بارزانیدا كوردستان بەئاراستەیەكی دیكەدا بجووڵێت.
قسەكانی حەیدەر عەبادی لەمیانی چاوپێكەوتنێكی بووە لەگەڵ هەفتەنامەی رووداو، كە باسی دووركەوتنەوەی خۆی لە سەركردایەتی حیزبی دەعوە و تێڕوانینی بۆ حكومەتی ئێستاو كێشەكانی ئەم حكومەتە، هەروەها ئاراستەی كاركردنی خۆی بۆ داهاتوو دەكات.
هاوكات باسی رووداوەكانی 16ی ئۆكتۆبەر، راپرسی سەربەخۆیی و پەیوەندی لەگەڵ سەركردایەتی كورد دەكات و دەڵێت تەنانەت لە كاتی گشتپرسی و 16ی ئۆكتبەریشدا پەیوەندی لەگەڵ مەسعود بارزانیدا نەپچڕاندووە.
لە ماوەی رابردوودا لە هەموو پۆستە حیزبییەكان و حیزبی دەعوە دەستت لەكاركێشایەوە، رەخنەشت گرتووە، حیزبی دەعوە بەم سەركردایەتییەی ئێستایەوە چۆن دەتوانێت جارێكی دیكە لە ئاستی تێڕوانینەكانی ئێوە بێت؟ چۆن دەتوانێت دەسەڵات بگرێتەوە دەست؟
حەیدەر عەبادی: حیزبی دەعوە لە حیزبە دێرینەكانە و قوربانیی زۆری لە دژی دیكتاتۆرییەت داوە، زۆر شتیشی پێشكەش بە گەلی عێراق و كۆمەڵگە بەشێوەیەكی گشتی كردووە. بەڵام ئێمە لێرە باسی كارەكان و كەسەكان دەكەین، هەموو كەسێك كە لە هەر حیزبێك یان رێچكەیەك كاربكات لە هەڵە نەپارێزراوە، بۆیە دەبێت لە هەر رێچكەیەك كاربكەین باشی بكەین، لەوانەش رێچكەی حیزب و رێچكەی دەوڵەت و هەر لایەنێك كە كاری تێدا بكەین. تاوەكو كارەكان باش بكەیت و چاكسازی بكەیت دەبێت رەخنە بگریت و ئاماژە بە هەڵەكان بكەیت، هیچ رێچكەیەك بێ هەڵە نییە، بۆیە ئێمە ئاماژە بەو هەڵانە دەكەین. من بۆچوونم لەگەڵ تۆ جیاوازە و پێموانییە حیزبی دەعوە بەو شێوەیە دەسەڵاتی گرتبێتە دەست، سەرۆكوەزیران بۆ سێ یان چوار خول لەوان بوو، بەڵام حكومەت لە عێراق حكومەتێكی هاوبەشە و چەند قەوارەیەك تێیدا بەشدارن، بۆیە هەموویان بەرپرسن لە شكست و سەركەوتن.
خراپترین هەڵەكانی حیزبی دەعوە لە پاش 2003 چی بووە؟
حەیدەر عەبادی: پێموایە نوێنەبوونەوەیە، هەموو حیزبێك پێویستە خۆی نوێ بكاتەوە. حیزبی دعوە رووبەڕووی هێرشێكی توند بووەوە لەلایەن دەسەڵاتی حیزبی بەعس، لەسێدارەدان و زیندان و زۆر لە ئەندامەكانی بۆ دەرەوەی عێراق كۆچیانكرد. حیزبەكە پێویستی بە تێكەڵبوونی زیاتر هەبوو لەگەڵ خەڵك، خۆشحاڵ دەبووین دەموچاوی زیاتری گەنج لە هەموو نەتەوە و ئاراستەكانمان ببینیایە. پێموایە حیزبەكە دەیتوانی زۆر لەوە زیاتر بكات كە تاوەكو ئێستا كردوویەتی.
سەركردایەتی نوێی حیزبی دەعوە دەتوانێت حیزب نوێبكاتەوە و بیگەڕێنێتەوە گۆڕەپانەكە؟
حەیدەر عەبادی: من تەمەنای ئەوەم دەكرد، بۆیە لە هەموو پێگەیەكی سەركردایەتی حیزبەكە كشامەوە و داوام لە براكانیشم كرد بكشێنەوە، بەڵام دیارە هەندێك هەن ئەوەیان ناوێت و دەیانەوێت بەردەوام بن لە پێگەكانیان، با چاوەڕان بكەین و ببینین، من خۆم ئێستا هیچ پۆستێكی سەركردایەتیم لەنێو حیزبی دەعوەدا نییە.
كەواتە تەنیا وەكو سەركردایەتی وازت هێناوە و هێشتا ئەندامی حیزبی دەعوەیت؟
حەیدەر عەبادی: ئەندامێتی لە حیزبی دەعوە كراوەیە، بەو مانایەی كە ناتوانیت واز لە مێژووت بهێنی، سەرەڕای ئەوەی واز لە پۆستێكی دیاریكراو دەهێنی، بەڵام مێژووی پەنجا ساڵ خەبات و جیهاد و رێچكەكە، من ناتوانم دەست لەم رێچكەیە بكێشمەوە، چونكە كاری زۆرمان تێدا كردووە و ناكرێت بەیەك هەنگاو بیسڕینەوە، بۆیە بەڵێ من بەردەوامم لەسەر ئەو رێچكەی قوربانیدان و بەخشندەییە.
دەتەوێت حیزبی دەعوە باش بكەیت یان حیزبی دیكە دروستبكەیت؟
حەیدەر عەبادی: نەخێر حیزبێكی دیكە دانامەزرێنم، پێموایە لەم كاتەدا پێویستمان بە حیزبی ئایدیۆلۆژی نییە، رەنگە حیزبە ئایدیۆلۆژییەكان شوێن و پێویستی دیكەیان هەبێت لە بوارێكی دیكەدا كە عێراق پێویستی پێیەتی.
وەكو ئۆپۆزسیۆنیت لە حیزبی دەعوەدا، هەروەها وەكو ئۆپۆزسیۆن دەبینرێیت لە حكومەتەكەی عادل عەبدولمەهدیدا، دەتەوێت لەگەڵ رەوتی حیكمە بەرەیەكی ئۆپۆزسیۆن دروستبكەن لە بەرامبەر حكومەتەكەی عەبدولمەهدی؟
حەیدەر عەبادی: رەوتی حیكمە لە ئێمەوە نزیكن، ئێمە لە یەك هاوپەیمانی بووین لە هاوپەیمانیی ئیسڵاح، پێش ئەوەش هاوپەیمانی هەبوو لە حكومەتی رابردوودا، ئەوان لە ئێمەوە نزیكن لە كارەكانیان و تێڕوانینەكانیان بەشێوەیەكی گشتی، بەڵام هەریەكەمان تایبەتمەندی خۆی هەیە، ئێمە لە ئۆپۆزسیۆندا بۆچوونی خۆمان هەیە و ناومان لێنا ئۆپۆزسیۆنی بەهێزكردن و بە وردیش روونمانكردەوە، خۆمان وا دانانێین كە دژی حكومەتی ئێستابین و ناشمانەوێ بیخەین یان لاوازی بكەین، بەڵكو دەمانەوێت بەهێزی بكەین، بەڵام شێوەی بەهێزكردنی ئەوەیە كە ئاماژە بە شوێنی كێشەكان بكەین تاوەكو ئەو كێشانە چارەسەر بكرێن، ئاماژە بە شوێنی هێزیش بكەین تاوەكو ئەو هێزە زیاد بكرێت، ئەمە ئاڕاستەی ئێمەیە لەم كاتەدا تاوەكو رەوشەكە چاك بكەین، بەڵام ئەگەر ئەم حكومەتە توانای چاكسازی نەبێت ئەوا شێوەیەكی دیكەی كاركردنمان دەبێ.
دیارترین رەخنەتان لەم حكومەتە چییە؟
حەیدەر عەبادی: رەنگە سێ بابەت بن، یەكەم پرسی ئاسایشە، حكومەت ئاسایشێكی باشی بۆ بەجێما، دەبوو لە سەرەتای كارەكانییەوە كارەكانی رابردووی تەواو كردبا كە دووبارە بونیادنانەوەی هێزە ئەمنییەكانە. ئێمە دەبینین لەم مەلەفەدا پاشەكشە هەیە. بابەتێكی دیكە خەرجییەكانی حكومەتە، لە سەردەمی ئێمەدا خەرجییەكانی حكومەتمان كەمكردەوە، بەڵام بەداخەوە تێبینی دەكەین حكومەت خەرجییەكان بە ئاستێكی مەترسیدار فراوان دەكاتەوە، ئێستا رەشنووسی بودجەیان بۆ ساڵی 2020 پێشكەش كردووە كە رەشنووسێكی مەترسیدارە، كەموكورتییەكی گەورەی تێدایە و خەرجییەكی ناسرووشتی و قبووڵنەكراوی تێدایە.. خاڵی سێیەم دانانی بەرژەوەندیی عێراقە لە پێش هەموو شتێكەوە، ئێمە مامەڵە لەگەڵ وڵاتانی دراوسێ دەكەین، بەڵام وا مامەڵە ناكەین وەڵامی هەموو شتێك بدەینەوە كە داوامان لێدەكەن و لە ئەنجامدا بەرژەوەندیی عێراق دابنێین، دەبێت مامەڵە لەگەڵ وڵاتانی دراوسێ بكەین بەشێوەیەك كە بەرژەوەندیی عێراق لە پێشینە دابنێین.
باس لەوە دەكرێت هەندێك هەوڵ هەن بۆ رووخاندنی حكومەتەكەی عەبدولمەهدی، هیچ زانیاریت لەمبارەیەوە هەیە؟
حەیدەر عەبادی: من هۆشداری دەدەم لە خستنی هەر حكومەتێك، حكومەت دەبێت كاتی خۆی وەربگرێت كە چوار ساڵە، دەبێت رێگە بدەین حكومەت چوار ساڵ كاربكات و ئەوە بەجێبگەیەنێت كە دەتوانێت. خستنی حكومەت لەكاتی كاركردنیدا دەبێتە هۆی لاوازكردنی دەوڵەت، چونكە جۆرە عورفێك دروستدەبێت بۆ خستنی حكومەتەكان لەكاتی ویلایەتەكانیاندا، ئەمەش دەبێتە هۆی پاشەكشەكردن لە دەوڵەت، لە یەك حاڵەتدا نەبێت، ئەگەر حكومەتەكە نەتوانێت بەردەوامبێت.
بەشێوەیەكی گشتی من دژی خستنی حكومەتم لەماوەی كاری خۆیدا ئەگەر حكومەتەكە توانای بەردەوامبوونی هەبوو.
لە 2017 پڕۆسەیەكتان دەستپێكرد بەناوی سەپاندنی یاسا، بەڵام دواتر دۆخێكی ناسەقامگیر دروستبووە و خەڵك لە كەركووك و ناوچەكە دەردەكرێن و بەرووبوومەكانی دەسووتێندرێ، پێتوایە لەو كاتەدا هەڵەكە روویداوە، بۆیە ئێستا بەم شێوازەیە؟
حەیدەر عەبادی: رەوشی كەركووك رەوشێكی تایبەتە لە دەستووری عێراقدا، بەگوێرەی دەستوور دەبێت رەوشی كەركووك لەژێر دەسەڵاتی فیدراڵیدا بمێنێتەوە، لەگەڵ هاتنی تیرۆر و داعش ئەم باڵانسە تێكچوو. من پێموایە یەكێك لەو هەڵانەی روویداوە ئەوەبوو كە داعش بەتواناخرا بۆ ئەوەی بێتە ژوورەوە، داعش حەویجەی داگیركرد و گەیشتە دەوروبەری كەركووك، سوپاس بۆ خودا توانیمان داعش لەناوببەین و ئەو ناوچانە ئازاد بكەینەوە، دەشبوو كەركووك بگەڕێتەوە بۆ رەوشی ئاسایی خۆی، ئێمە ئەوەمان كرد، من بۆچوونم جیایە، رەنگە پێكەوەژیان ئێستا لە كەركووك لەنێوان نەتەوە و پێكهاتەكان لە پێشتر باشترە، ئەو دەسەڵاتە فیدراڵییە لە كەركووك هەیە لانیكەم لە سەردەمی مندا فەرمانی تووند هەبوو بۆ ئەوەی مامەڵە لەگەڵ هاووڵاتییان بكەن لە كەركووك لەسەر بنەمای ئەوەی هاووڵاتین بەبێ لەبەرچاوگرتنی نەتەوە، سوپاس بۆ خودا هێزە ئەمنییەكان سەركەوتووبوون لە مامەڵەكردن بەشێوەیەكی باش لەگەڵ هاووڵاتییان لە كەركووك، ئێمە تەنانەت گۆڕانكاریمان لە پۆلیسی خۆجێی كەركووك نەكرد كە زۆرینەیان خەڵكی پارێزگاكەن. پێموانییە رەوشی ئێستای كەركووك لە پێشوو خراپتر بێت، بەڵكو باشترە لە پێشتر كاتێك كە یەك لایەن كۆنترۆڵی كەركووكی كردبوو.
بەڵام هەندێك لە كەركووكییەكان هێشتا ئاوارەن لە هەرێمی كوردستان، بەشێك لە دەغڵودانی خەڵكیش سووتێندرا، باشی لەكوێدایە؟
حەیدەر عەبادی: سووتاندنی دەغڵودان تاوانە و هیواداربووم حكومەت روونكردنەوەی هەبێت لەسەر ئەوەی بۆچی ئەمساڵ دەغڵودانەكان بەشێوەیەكی فراوان سووتێندران، نەك تەنیا لە كەركووك بەڵكو لە نەینەوا و ناوچەكانی دیكەش. هەوڵێك هەبوو لایەن تیرۆریستانەوە یان لایەنێكی دیكە، دەبوو حكومەت لێكۆڵینەوەیەكی گشتگیری بكردبا لەوبارەیەوە، بە هەرحاڵ ئەمە پەیوەندی بە دووبارە سەپاندنەوەی یاسا لە كەركووك نییە، بێگومان ناخۆشە بەلای منەوە كە پروپاگەندە و هەڵمەتێكی میدیایی تووند هەبوو لەلایەن چەند حیزبێكەوە لە كوردستان كە هێزەكانی لە كەركووك بە داگیركەر ناودەبرد. ئەوەی ئێمە هەوڵمان بۆ دا رێگری بوو لە دابەشبوونی وڵاتەكە. ئاسایش و یاسا لە كەركووك بەبێ رژاندنی خوێن سەپێندرا، بەڵام بۆ خوێن لە دووزخوورماتوو رژا؟
دووزخورماتوو بە تەواوی لەژێر دەسەڵاتی پێشمەرگە بوو، پێش ساڵێك داوامانكرد رێگە بدەن هێزی فیدراڵی عێراق لەگەڵیانبێت بۆ ئەوەی ئاسایش باشتربێت، بەڵام رەتیانكردەوە. پاشان پێكدادان روویدا لەگەڵ دانیشتووان. دەزانن كە هەستیاری هەبوو لەنێوان برایانی توركمان و كورد لە دووزخورماتوو. پێشمەرگە بەرپەرچیدانەوە و پاشان بەیەكجاری رۆیشتن و پشێوی روویدا. لە ماوەی 24 كاژێردا فەرمانمكرد هێزی فیدراڵی بنێردرێت و دووزخورماتوو كۆنترۆڵكرایەوە و ئاسایش سەپێندرا.
دەوترێت ئەگەر رێككەوتن لەگەڵ گرووپێكی نێو ی.ن.ك نەبووایە كە بە گرووپی 16ی ئۆكتۆبەر ناسراون، نەتاندەتوانی بچنە نێو كەركووكەوە، دەمەوێت ئەوە روونبكەیتەوە رێككەوتنەكە چۆن بووە؟
حەیدەر عەبادی: ئەو قسەیە ورد و راست نییە، من راستییەكەت پێدەڵێم، راستییەكە ئەوەیە من بەشێوەیەكی روون لەگەڵ پێشمەرگە مامەڵەم كرد، پێشمەرگەم وەكو دوژمن دانەنا. گوتارەكەم بۆ پێشمەرگە ئەوەبوو كە ئێوە لەئێمەن و رێزتان لێدەگرم و هاوئاهەنگیتان لەگەڵ دەكەم. پێشمەرگە شەڕی نەكرد سەرەڕای ئەوەی سەركردایەتییەكان فەرمانیان پێكردن شەڕ بكەن. پێشمەرگە نەیویست بچێتە شەڕەوە لەگەڵ هێزی ئەمنی عێراق. من لەمیدیادا بیستم كە لایەنێك بە خیانەت تۆماتباركراوە، من پێموایە پێش ئەوەی كەسێكی دیكە بە خیانەت تۆماتباربكەیت، تۆ بە سیاسەتی خۆتدا بچیتەوە.
بەڵام رەنگە هەندێك بڵێن پێشمەرگە لە پردێ و سحێلا شەڕی كرد؟
حەیدەر عەبادی: ئەمە دواتر بوو، پاش ماوەیەك فەرمان دەرچوو، هەوڵێك بوو بۆ سەرقاڵكردن و خوێنڕشتن، ئەمەش سیاسەتێكی هەڵەیە. بەداخەوە هەندێك لایەن لە هەرێمی كوردستان، میدیاكانیان خوێنڕشتن و شەڕی دەویست، تاوەكو كورد لە پشتی بمێننەوە و كۆنترۆڵی كورد بكات.
ئێمە سیاسەتەكەمان تەواو پێچەوانەبوو، نەماندەویست خوێن بڕژێت، بەڕاشكاوی من شتێكت بۆ باس دەكەم، ئێمە دەمانتوانی لەوە زیاتر بڕۆین چونكە زەوییەكەی پێشمان كراوەبوو، بەڵام نەمانویست ئەوە بكەین، چونكە زانیمان ئەگەر هێزەكانمان زیاتر بڕۆن خوێن دەڕژێت.
ئەگەر دەتوانتوانی زیاتر بێنە پێشەوە، خۆ ئەبرامزەكەتان لە پردێ شكا كە پێشمەرگە شەڕی كرد حەشدی شەعبیش شكا، چۆن دەتانتوانی زیاتر بێنە پێشەوە؟
حەیدەر عەبادی: راست نییە، ئەوە دەستدرێژییەكی بێ پاساو بوو، هەوڵێك بوو بۆ رووبەڕووبوونەوە لەگەڵ سوپای عێراق. ئەو تانكانە لە بنەڕەتدا ئاڕاستەی بەرەو هەولێر نەبوو، بەڵكو تەنیا یاسا سەپێندرا، خەلەلێك روویدا و لێكۆڵینەوەش لەوبارەیەوە كرا. هەوڵێك بوو لەلایەن هەندێك سەركردە لە هەرێمی كوردستان بۆ راكێشانی سوپای عێراق بۆ شەڕی راستەوخۆ، ئێمە لەو بابەتە دووركەوتینەوە لە كۆتاییدا من سەرۆكوەزیرانی عێراقم و بەرژەوەندیی كوردم بەلاوە گرنگە، هەروەكو چۆن بەرژەوەندیی عەرەبم بەلاوە گرنگە. من ئازار دەچێژم كاتێك دەبینم كوردێك دەكوژرێت یان كوردێك ئازار دەچێژێت یان مووچەی نییە، بۆیە بیرتانە كە گوتیان پارە نییە بۆ پێدانی مووچە و گەیشتە قۆناخێكی سەخت لە كوردستان، تیمێكم نارد بۆ ئەوەی لێكۆڵینەوە لە بابەتەكە بكەن و وردبینییان لە مووچەكاندا كرد، گەیشتنە ئەوەی كە 400 هەزار فەرمانبەر لە هەرێمدا هەن، ئەم زانیارییانە لەلایەن هەرێمەوە دران، بەگوێرەی ئەوەش مووچەمان بۆ فەرمانبەران لە هەرێمی كوردستان خەرجكرد.
لە گشتپرسیدا كۆمەڵێك سزاتان خستە سەر هەرێمی كوردستان، هۆكاری چی بوو؟
حەیدەر عەبادی: ئێمە سزامان نەسەپاند، ئەوان هەوڵیاندا ناوی بنێن سزا، ئێمە هەوڵمداندا میكانیزمی دروست بسەپێنین، هەر شتێك كە پەیوەندی بە دەرەوەی عێراقەوە هەبێت فیدراڵییە، بۆیە ئەگەر تێبینی بكەیت لە فڕۆكەخانەی هەولێر و سلێمانی رێگریمان لە گەشتە نێوخۆییەكان نەكرد، چونكە فیدراڵی نییە، ئێمە رێگریمان كرد لە گەشتەكان بۆ دەرەوە تاوەكو دەسەڵاتی فیدراڵی دەسەپێندرێت، ئێمە ویستمان ئەوە بەسەپێنین بەڵام ئەوان رەتیانكردەوە، بۆیە ناچاربووین گەشتەكان بۆ دەرەوە رابگرین. پاش پابەندبوونیان گەشتەكانمان گەڕاندنەوە. بابەتێكی دیكە هەیە، سوپای عێراق بەرگری لە كوردستانیش كرد، پێشمەرگە و هێزەكانی دیكە و خەڵك شەوان بە ئارامی دەخەوتن. هێزەكانی سوپای عێراق لە چەند میحوەرێكدا بەشداربوون لەگەڵ پێشمەرگە و پێكەوە كۆتاییمان بە داعش هێنا، دروست نەبوو پاش ئازادكردنی مووسڵ گشتپرسی بكەیت و بتەوێت بەشێك لە عێراق جیابكەیتەوە، ئێمە شەریكین لە عێراق و كاتێكیش شەریكیش دەبیت مافی تۆ نییە بەشێك لە شەراكەتەكە داببڕیت بەبێ رێككەوتن و لێكتێگەیشتن. پێموایە ئەو سەركردانەی گشتپرسییەكەیان كرد ئەوە لە ئەستۆ دەگرن كە روویدا، نەك من.
سەركردایەتی كورد چەند جارێك شاندیان هاتە بەغدا و گوتیان ئەو گشتپرسییە بۆ جیابوونەوە نییە و تەنیا بۆ وەرگرتنی بۆچوونی خەڵكە؟
حەیدەر عەبادی: راستە ئەوەیانگوت، من پێمگوتن كەواتە ئەوە گشتپرسی نییە و وەرگرتنی بۆچوونی خەڵكە، زۆر لە دەزگاكانی میدیا و دامەزراوەی دیكە راپرسی دەكەن، كەواتە بۆچی لە هەرێم حكومەت ئەو كارە دەكات، بۆچوون لە رێگەی دامەزراوەكانی دیكەوە وەربگرن. من وەكو سەرۆكوەزیران پێشتریش رامگەیاندبوو كە رێز لە خواستنی كورد دەگرم كە دەیانەوێت دەوڵەتێك دروستبكەن لە ناوخۆی عێراق یان دەرەوەی عێراق، بەڵام ئەمە شتێكە و بتەوێت تاكلایەنە بەشێك لە عێراق جیابكەیتەوە شتێكی دیكەیە. ئەوان ئەوەیانگوت بەڵام كاتێك لە گشتپرسی نزیكبوونەوە باسی شتێكی دیكەیان دەكرد، باسیان لە ئەمری واقع دەكرد، من تاوەكو گشتپرسیش هیچم نەكرد، بەڵێ داوام لە دادگای فیدراڵی كرد كە گشتپرسییەكە رەتبكاتەوە و كۆمەڵگەی نێودەوڵەتیمان ئاگاداركردەوە كە ئێمە دژی ئەوەین، كۆمەڵگەی نێودەوڵەتیش لەگەڵ ئێمە بوو.
دەوترێ ئەو رێكارانەتان بۆ ئەوە بوو شەعبییەتتان بۆ كاتی هەڵبژاردن زیادبكات؟
حەیدەر عەبادی: نەخێر من پێویستم بەوە نەبوو، ئەگەر ئەوەم بویستبا ئەوا ئاهەنگی گەورەم لە كەركووك و ناوچەكانی دیكە دەكرد، من تەنانەت لە كاتی بانگەشەی هەڵبژاردن سەردانی كەركووكیشم نەكرد، من ئەوەم نەدەویست، ئەگەر بمویستبا ویلایەتی دووەم ببەمەوە ئەوە دەمتوانی نەفەسی دژایەتی عەرەب بەرامبەر كورد زیاد بكەم و عەرەب دەنگیان بۆ دەدام، بەڵام من ئەوەم نەكرد، بەڵكو سووربووم لەسەر بەرژەوەندی خەڵك و هاووڵاتییانی كورد.
لە دوای رووداوەكانی ئۆكتۆبەری 2017 هەندێك پەیوەندی راگەیێندراو و ناڕاگەیێندراوتان هەبوو بەتایبەت لەگەڵ نێچیرڤان بارزانی كە سەرۆكوەزیران بوو، بۆ ئەوەی پەیوەندییەكان رێكبخەنەوە، ئەوە چۆن بوو؟
حەیدەر عەبادی: زۆربەی راگەیێندراو بوو، سەردانی فەرمی و دروستبوو، ئامانجەكە ئەوەبوو كە ئێمە لە یەك وڵاتداین و دەبێت لەو چوارچێوەیەدا هاوئاهەنگ بین. تۆ دەڵێی سزا، بەڵام كردنەوەی فڕۆكەخانەكان پێش هەڵبژاردن بوو بە دوو مانگ، ناردنی مووچە پێش هەڵبژاردن بوو، كەواتە سزا نەبوو، ئەگەر بەڕاستی بمویستبا سەربكەوم ئەوا فڕۆكەخانەم نەدەكردەوە و مووچەم نەدەنارد تاوەكو پاش هەڵبژاردن بۆ ئەوەی سەربكەوم. پێموایە هاوئاهەنگییەكی باش بوو و بەڕێز نێچیرڤان بارزانی لەم چوارچێوەیەدا هاوئاهەنگ بوو و خۆشحاڵبوو بەو هاوئاهەنگییە و لێكتێگەیشتنی باش هەبوو لەنێوانمان، ئەو لە كەسایەتی و سەركردە گەنجەكانە و منیش گەشبینم بەوەی كە كوردستان رەنگە بە ئاڕاستەیەكی دیكە بجووڵێت، هەروەها پەیوەندییەكانمان لەگەڵ بەڕێز مەسروور بارزانیشدا باش بوو، تەنانەت لەگەڵ بەڕێز مەسعوود بارزانیشدا پەیوەندییەكان نەپچڕان لەو چوارچێوەیەدا.
تەنانەت لە پاش 16ی ئۆكتۆبەریش پەیوەندیتان نەپچڕاند؟
حەیدەر عەبادی: نەخێر، تەنانەت لە كاتی گشتپرسیشدا پەیوەندی هەبوو بۆ ئەوەی هەوڵی راگرتنی لێكەوتەكانی بدەین، ئەمە بابەت و ململانێیەكی شەخسی نییە، بەپێچەوانەوە پەیوەندییەكانمان زۆرباشن، بەڵام تێڕوانین هەیە لەسەر ئەوەی كە روودەدات و بەرژەوەندی وڵات و گەلێك هەیە، بۆیە بەشێك لەو رێكارانەی كە گرتمەبەر لەو چوارچێوەیەدابوو، بە بەڵگەی ئەوە پەیوەندییەكانم لەگەڵ بەرێز مەسعوود بارزانی تێكنەچوون، ئەو سەردانی كردم كە هاتە بەغدا، بەو مانایەی كە هیچ شتێك نییە و هیچ شتێكی شەخسیم لەدژی ئەو نەكرد و ئەویش هیچ شتێكی شەخسی لەدژم نەكرد.
